🟣२० वर्षापासून कारंजातील एकाही अंगणवाडी केंद्रामध्ये वीज, पाणी या मूलभूत सुविधा नाही 🔵कारंजा नागरी समस्या संघर्ष समितीने जिल्हाधिकाऱ्यांची भेट घेऊन मांडली समस्या

🟣२० वर्षापासून कारंजातील एकाही अंगणवाडी केंद्रामध्ये वीज, पाणी या मूलभूत सुविधा नाही

🔵कारंजा नागरी समस्या संघर्ष समितीने जिल्हाधिकाऱ्यांची भेट घेऊन मांडली समस्या

Akluj Vaibhav News Network.
Chief Editor Bhagywant Laxman Naykude.
Akluj , Taluka Malshiras, District Solapur. Maharashtra State, India.
Mo. 9860959764.

(वर्धा जिल्हा प्रतिनिधी)

कारंजा ( घा.) दिनांक 25/7/2023 : स्थानिक कारंजा शहरातील विविध प्रभागात एकूण १५ अंगणवाडी केंद्र आहेत. परंतु गेली २० वर्षापासून सर्व अंगणवाडी केंद्रामध्ये वीज, पाणी या मूलभूत सुविधा पोहचल्याच नाहीत. अशी समस्या कारंजा नागरी समस्या संघर्ष समितीने जिल्हाधिकारी यांची प्रत्यक्ष भेट घेऊन निवेदनाद्वारे मांडली आहे. तसेच शौचालय व इतर सेवा सुविधांचाही अभाव असल्याचे म्हटले आहे.
कारंजा शहरातील अंगणवाडी केंद्रांमधून गोरगरिबांची मुले शिक्षण घेतात, मुलांना विविध प्रकारचे लसीकरण केले जाते, गर्भवती महिलांची सुपोषण सभा घेतल्या जाते, अन्नप्राशन दिवस साजरा केला जातो, किशोरी सभा घेतल्या जाते, पोषण आहाराचे वाटप केले जाते. अशी सगळी कामे अंगणवाडी केंद्रातून होत असतात परंतु कारंजा शहरातील एकाही अंगणवाडी केंद्रामध्ये विद्युत पुरवठा नाही. विद्युत पुरवठा नसल्यामुळे फॅन ची सुविधा नाही. नळ कनेक्शन नाही, पाण्याची टाकी नाही, अंगणवाडीतील शौचालय नीट अवस्थेत नाही, काही अंगणवाडी केंद्राची डागडुजी करणे आवश्यक आहे. १५ अंगणवाडी केंद्र पैकी २ अंगणवाडी केंद्राला इमारत नाही. मागील पाच ते सहा वर्षापासून येथील अंगणवाडी केंद्रात ६ मदतनिसांची पदे रिक्त आहेत.
अशा विविध समस्यांनी येथील येथील अंगणवाडी केंद्र त्रस्त आहे. परंतु कोणतेही लोकप्रतिनिधी यासारख्या मूलभूत समस्येकडे लक्ष द्यायला तयार नाही.
आजपर्यंत एकात्मिक बालविकास प्रकल्प सेवा योजना (ग्रामीण) यांनाही अंगणवाडी केंद्रात वीज, पाणी या सुविधा महत्वाच्या वाटल्या नसेल काय ? २०१५ नंतर निर्माण झालेल्या स्थानिक नगर पंचायत मधील महीला व बालविकास विभागाचेही अंगणवाडी केंद्रातील वीज – पाण्याच्या समस्येकडे लक्ष गेले नसेल का ? असा प्रश्न नागरी समितीने उपस्थित केला आहे.
ही गंभीर व मूलभूत समस्या लक्षात घेऊन मागील वर्षी ९ मार्च २०२२ रोजी एकात्मिक बालविकास अधिकारी यांना नागरी समितीने निवेदन देऊन सर्व अंगणवाडी केंद्रामध्ये वीज पाणी व सेवा सुविधा द्या. अशी मागणी केली होती. त्यानंतर २० एप्रिल २०२२ रोजी
नगर पंचायतचे मुख्याधिकारी यांना २९ मार्च २०२२ च्या नगर विकास विभागाच्या पत्रातील मार्गदर्शक सूचनेनुसार नगर पंचायतीच्या वार्षिक एकूण महसुली उत्पन्नातून बांधील खर्च वजा जाता उर्वरित रकमेच्या पाच टक्के रक्कम राखीव ठेवून ती अंगणवाडीतील सेवा-सुविधा करीता वापरावी अशी मागणी नागरी समितीने निवेदनाद्वारे केली होती. परंतु नगर पंचायत ने सुद्धा या मागणीची दखल घेतली नाही. २५ जानेवारी २०२३ रोजी हीच समस्या मुख्याधिकारी जि. प. यांच्यापुढे ही नागरी समितीने मांडली होती.
या वर्षी १ एप्रिल २०२३ पासून आयुक्तालयाच्या आदेशानुसार जिल्हा परिषदेचे मुख्याधिकारी यांनी शहरी विभागातील सर्व अंगणवाडी केंद्र नागरी प्रकल्पाकडे हस्तांतरीत केले आहे. तेव्हापासून कारंजातील सर्व अंगणवाडी केंद्राचा मासिक अहवाल एकात्मिक बाल विकास सेवा योजना नागरी प्रकल्पाकडे जात आहे.
आता तरी नागरी प्रकल्प व नगर पंचायतने संयुक्तपणे कारंजा शहरातील सर्व अगंणवाडी केंद्रामध्ये वीज, पाणी यासारख्या मूलभूत सेवा – सुविधा कराव्यात अशी मागणी कारंजा नागरी समस्या संघर्ष समितीने जिल्हाधिकारी यांची प्रत्यक्ष भेट घेऊन निवेदनाद्वारे केली आहे.
संबंधित विभागा कडून सदर समस्या सोडविल्या जातील असे जिल्हाधिकारी यांनी नागरी समितीला आस्वासित केले असल्याचे नागरी समितीने म्हटले आहे.