🟣” उद्धव ठाकरेंनी काय कमावलं?”

प्रासंगिक लेख……✍️

🟣” उद्धव ठाकरेंनी काय कमावलं?”

🔵दै.तरूण भारत(२३जून) मध्ये ज्येष्ठ पत्रकार मोरेश्र्वर बडगे यांचा ‘प्रासंगिक’ सदरात व ” उद्धव ठाकरेंनी काय कमावलं?”या शिर्षकाखाली प्रसिद्ध झालेला लेख वाचला.या लेखाचा सुसूत्र,सविस्तर गोषवारा

Akluj Vaibhav News Network.
Chief Editor Bhagywant Laxman Naykude.
Akluj , Taluka Malshiras District Solapur Maharashtra State India.
Mo. 9860959764.

अकलूज दिनांक 24/6/2023 :
मराठी अस्मितेचा मुद्दा घेऊन ५७ वर्षापूर्वी बाळासाहेब ठाकरे यांनी शिवसेनेची स्थापना केली. ५७ वर्षात बंडू शिंगरे इथपासून तो छगन भुजबळ, राज ठाकरे, नारायण राणेपर्यत अनेक नेते शिवसेनेतून बाहेर पडले. राज ठाकरे तर उद्धव व त्यांच्या भोवतीच्या चौकडीला कारकून संबोधून बाळासाहेबांच्या हयातीतच बाहेर पडले होते. शिवसेना प्रमुख बाळासाहेब ठाकरे यांनी अशी वादळे खूप पाहिली पण त्यांची दहशत, दरारा, धाक, मात्र कायम होता व शिवसेना ताठ मानेने उभी होती.प्रमोद महाजन यांनी भाजप-शिवसेना युती घडवून आणली.या युतीमुळे दोघांना सत्तेची फळे चाखायला मिळाली.खरी गडबड २०१९ च्या निवडणुकीनंतर झाली. मतदारांनी युतीच्या बाजूने कौल दिला होता.मात्र शरद पवारांच्या सापळ्यात उद्धव अडकले.उद्धव ठाकरे यांनी दोन काँग्रेससोबत घरोबा केला.काँग्रेससोबत बसण्याचा प्रसंग आला तर मी शिवसेनेचे दुकान बंद करीन,असे शिवसेना प्रमुख बाळासाहेब ठाकरे म्हणत. पण उद्धव ठाकरे यांनी आपल्या पित्याच्याच विचारांशी गद्दारी करत काँग्रेसपक्षासोबतच घरोबा केला.महाआघाडी सरकार जन्माला आले.उद्धव ठाकरे मुख्यमंत्री झाले. उद्धव यांचे घोडे गंगेत न्हाले.मुख्यमंत्री होण्याच्या नादात उद्धव ठाकरे यांनी वडिलांचा वारसा गमावला. शिवसेनेतल्या अनेकांना हे पसंत नव्हते.आपल्या ज्येष्ठ सहकार्‍यांवर अविश्र्वास दाखविल्यामुळे त्याचा कधीनाकधी स्फोट होणार होता तो अखेर झाला. एकनाथ शिंदे यांच्या नेतृत्वाखाली शिवसेनेच्या ४० आमदारांनी बंड केले. आणि २५ वषे राज्य करण्याची भाषा करणार्‍या उद्धव ठाकरे यांना राजीनामा देऊन,अवघ्या अडीच वर्षात घरी बसावे लागले.कोती मनोवृत्ती आणि भोवती खुशमस्करी कोंडाळे, आपल्याच सहकार्‍यावर अविश्र्वास अशा असुरक्षिततेच्या हवेत काही वेगळे अपेक्षित नव्हते.
एकनाथ शिंदे मुख्यमंत्री आणि देवेंद्र फडणवीस उपमुख्यमंत्री झाले.शिवसेनेतील बंडाळीला एक वर्ष पूर्ण झाले.शिवसेनेत उभी फूट पडल्याने शिंदे गट आणि उबाठा तथा उद्धव बाळासाहेब ठाकरे गट असे दुभंगलेल्या शिवसेनेचे दोन- दोन वर्धापन दिन सोहळे या १९ जूनला महाराष्ट्राने पाहिले.निवडणूक आयोगाने एकनाथ शिंदे यांच्या गटाला शिवसेनेचे नाव आणि निवडणूक चिन्ह बहाल केले.म्हणजे शिंदेची सेना म्हणजे अधिकृत शिवसेना असे आज आपल्याला म्हणता येईल.विधानसभा अध्यक्ष राहुल नार्वेकरांचा १६आमदाराच्या अपात्रतेचा निर्णय येणे बाकी आहे.हा शेवटचा निकाल असेल. अजूनही आपले काही चुकले असे मानायला उद्धव ठाकरे तयार नाहीत. शरद पवार आपल्याला वाचवतील अशी त्यांना आशा आहे.२० जून हा त्यांनी गद्दार दिन म्हणून पाळला.आपल्याच आमदारांना ते गद्दार म्हणतात पण पहिले गद्दार आपण स्वतः आहोत,हे ते सोयीस्करपणे विसरतात. युतीत निवडणूक लढली असताना त्यांनी भाजपशी गद्दारी केली.वसंतदादा पाटील यांच्या पाठीत खंजीर खुपसून मुख्यमंत्री होणार्‍या आणि पुढे सोनिया गांधी विदेशी आहेत,असे सांगून राष्ट्रवादी काँग्रेसची चूल मांडणार्‍या, शरद पवारांसारख्या महागद्दाराशी त्यांनी संगत केली.
आजही उबाठा म्हणजे उद्धव बाळासाहेब ठाकरे शिवसेना आहे मात्र तो आत्मा कुठेतरी हरवलाय. बाळासाहेब असतानाचा तो दरारा,तो धाक,ती दहशत मात्र गायब आहे.आज दोन गट आहेत.भविष्यात रिपब्लिकन पक्षाप्रमाणे शिवसेनेचेही डझनभर गट होतील.स्वार्थी महत्त्वाकांक्षेपायी उद्धव ठाकरे यांनी शिवसेना कुठे आणून ठेवली असा प्रश्र्न आता सामान्य शिवसैनिकांच्या मनात खदखदत आहे.आगामी सर्व निवडणुका महाआघाडीने एकत्र लढायचे ठरले असताना बिघाडी सुरू झाली आहे.इच्छा आहे तोपर्यत आम्ही महाआघाडीत राहू असे सांगून ठाकरे गटाचे खासदार संजय राऊत मोकळे झाले आहेत.निवडणुका जवळ आल्या असताना वज्रमूठ सभा बंद पडल्या आहेत. जागा वाटपाच्या बैठकांचा पत्ता नाही. महाआघाडी ही गाजराची पुंगी होती.आता वाजणार नाही म्हणून शरद पवार ती मोडून खाणार!त्याचे संकेत मिळू लागले आहेत.महाआघाडीने आज जर विधानसभा निवडणुका लढविल्या तर १०० जागांच्या आत ती संपेल असा एका वृत्तवाहिनीने नुकताच केलेला सर्व्हे सांगत असल्यामुळे, दोन्ही काँग्रेसचे नेते घाबरले आहेत. भाजपला ३०% शिंदेगटाला १६% अशी एकूण ४६% मते मिळतील आणि महायुतीच्या जागा १७० पर्यत जाऊ शकतात असेही या सर्व्हेने म्हटले आहे.या सर्व्हेत उद्धव ठाकरे यांना सहानुभूती दिसत नाही.ठाकरे गटाला तर १५-२०जागा मिळतील असे एलिनचा सर्व्हे म्हणतो. उद्धव ठाकरेंना सोबत घेऊन लढण्यात आपल्या जागा कमी होण्याचा धोका दोन्ही काँग्रेसच्या लक्षात आला आहे.बदलत्या हवेचा वास सर्वात आधी लागणार्‍या शरद पवारांनी,पुतण्याच्या भीतीने, राजीनाम्याचे नाटक करून, राष्ट्रवादीची सूत्रे मुलीकडे दिली आहेत व ते आता पद्धतशीरपणे मोकळे झाले आहेत.नाना पटोले तर सुरूवातीपासून स्वबळाचा मंत्र जपत आले आहेत. प्रकाश आंबेडकर औगजेबाच्या कबरीवर फुले वाहून आले;पण उद्धव ठाकरे एक शब्द बोलायला तयार नाहीत.हिंदुत्व वजा केले तर उद्धव ठाकरे यांच्याकडे काहीही उरलेले नाही.लढायला नेत्यांची फौज नाही.आहेत ते संजय राऊत जे दररोज आपल्या फाटक्या तोंडाने उबाठाची उरलीसुरली व्होट बँक रिकामी करत आहेत.त्या उलट एकनाथ शिंदेकडे सत्तेचे बळ आहे;सोबत देवेंद्र फडणवीस यांच्यासारखा चाणाक्य आहे.ठाकरे गटात आऊट गोईंग सुरू झाले आहे,ते त्या भयापोटी.ज्येष्ठ पत्रकार मोरेश्र्वर बडगे यांनी लेखात केलेले हे भाष्य व विवेचन-विश्लेषण खरोखरच उल्लेखनीय, विचारप्रवर्तक व संबंधितांना अंतर्मुख करणारे ठरते असे म्हटल्यास ते वावगे ठरू नये हे मात्र तितकेच खरे !

पत्रकार अरूण दीक्षित.
८१६०१०५९४०/९४२२६९४६६६