🔰 सोलापूर जिल्ह्याला केंद्र सरकारच्या केळी निर्यात क्षेत्रात समाविष्ट करावे 🟩 केंद्रीय वाणिज्य मंत्री पियुष गोयल यांच्याकडे खासदार धैर्यशील मोहिते-पाटील यांची मागणी

Chief Editor04/12/2024Last Updated: 04/12/2024

74 1 minute read

🔰 सोलापूर जिल्ह्याला केंद्र सरकारच्या केळी निर्यात क्षेत्रात समाविष्ट करावे

🟩 केंद्रीय वाणिज्य मंत्री पियुष गोयल यांच्याकडे खासदार धैर्यशील मोहिते-पाटील यांची मागणी

अकलूज वैभव न्यूज नेटवर्क
आकाश भाग्यवंत नायकुडे
मुंबई दिनांक 03/12/2024 :
सरकारने भारतात उत्पादित विविध कृषी उत्पादनांच्या निर्यातीस प्रोत्साहन देण्यासाठी क्षेत्रीय विकास कार्यक्रम राबविण्यास सुरुवात केली आहे. कृषी उत्पादन निर्यातासाठी आवश्यक सोयीसुविधा उपलब्धतेसाठी अपेडा (APEDA) संस्थेमार्फत कृषी निर्यात कर्ज योजना जाहीर करण्यात आली आहे. देशातील २० राज्यांमधील २३० जिल्ह्यांमध्ये ६० कृषी उत्पादनांच्या निर्यात क्षेत्रांना मान्यता देण्यात आली आहे महाराष्ट्रातील यात जळगाव, धुळे, नंदुरबार, वर्धा, परभणी, हिंगोली व नांदेड या जिल्ह्यांना केळी निर्यात क्षेत्रात समाविष्ट करण्यात आले आहे.
हे लक्षात घेता, सोलापूर जिल्ह्यात सध्या केळी लागवडीखालील क्षेत्र मोठ्या प्रमाणावर वाढले असून सुमारे १९ हजार हेक्टर क्षेत्र केळी लागवडीखाली आहे. केळी निर्यातीच्या दृष्टीने विचार करता, देशातील एकूण केळी निर्यातीपैकी ६३% निर्यात महाराष्ट्रातून होते. यातील सुमारे ५८% निर्यात केवळ सोलापूर जिल्ह्यातून होते. मागील वर्षी महाराष्ट्रातून सुमारे ११ लाख २३ हजार ५२४ मेट्रिक टन केळी निर्यात झाली, यापैकी सुमारे ६ लाख ४८ हजार २६२ मेट्रिक टन केळी सोलापूर जिल्ह्यातून निर्यात झाली. एप्रिल २०२३ ते सप्टेंबर २०२४ या कालावधीत राज्यातून सुमारे २५ हजार कंटेनर केळी निर्यात झाली असून यातील १६ हजार कंटेनर सोलापूर जिल्ह्यातून निर्यात झाले आहेत ही बाबा खासदार धैर्यशील मोहिते-पाटील यांनी केंद्रीय मंत्री वाणिज्य मंत्री पियुष गोयल यांच्या लक्षात आणून देऊन सोलापूर जिल्ह्याला केंद्र सरकारच्या केळी निर्यात क्षेत्रात समाविष्ट करावे म्हणून निवेदन देऊन मागणी केली.
जिल्ह्यातील केळीची विक्रमी उत्पादन व निर्यात लक्षात घेता सोलापूर जिल्ह्याला केंद्र सरकारच्या केळी निर्यात क्षेत्रात समाविष्ट करावे, ज्यामुळे शेतकऱ्यांनी पिकवलेल्या केळींच्या गुणवत्तेत सुधारणा होऊन सोलापूर जिल्ह्यातील केळी उत्पादकांना जागतिक बाजारपेठेत निर्यात संधी प्राप्त होतील खासदार धैर्यशील मोहिते-पाटील प्रयत्नशील असून याबाबत केंद्रीय मंत्री पियुष गोयल यांनी सकारात्मकता दर्शवली आहे..