🔵मार्च संपत आला तरीही अकलूज महाळुंग रस्त्याचा वनवास नाही संपला 🟣 गुलाल खोबरे म्हणून निवडणूक काळात हे ढीग कोणाच्या नावाने उधळायचे? त्रस्त नागरिकांच्या संतप्त प्रतिक्रिया

संपादकीय…..✍️

🔵मार्च संपत आला तरीही अकलूज महाळुंग रस्त्याचा वनवास नाही संपला

🟣 गुलाल खोबरे म्हणून निवडणूक काळात हे ढीग कोणाच्या नावाने उधळायचे? त्रस्त नागरिकांच्या संतप्त प्रतिक्रिया

Akluj Vaibhav News Network.
Chief Editor Bhagywant Laxmanrao Naykude.
Akluj, Taluka Malshiras, District Solapur. Maharashtra state, India.
Mo. 98 60 95 97 64

🔰आकाश भाग्यवंत नायकुडे

अकलूज दिनांक 27/03/2024 :
सोलापूर जिल्ह्याच्या राजकीय पटलावर नावाजलेल्या अकलूज मधून महाळुंग मार्गे श्रीपुर बोरगावकडे जाणाऱ्या रस्त्याची पूरती वाट लागली असतानादेखील एक वर्षाहून अधिक काळ लोटला तरी देखील या रस्त्याचे काम अपूर्णावस्थेतच आहे. मार्च एंड संपत आला तरीही या रस्त्याचा वनवास अजून संपला नाही. लोकसभा निवडणूक आचारसंहिता सुरू झाली. निवडणुकीचे वारे झंजावातात रूपांतर होण्याची वेळ नजीक येऊन ठेपली असताना आत्ता कोठे संबंधित ठेकेदार जागृत झालेला दिसत आहे. अर्धवट रस्त्याचे काम कागदोपत्री पूर्णावस्तेत दाखवून आर्थिक तडजोडीतून न झालेल्या कामाची बिले पदरात पाडून घेण्याची धडपड, लगबग सुरू आहे. वर्षभर या रस्त्यावरून येणाऱ्या जाणाऱ्यांचे शिव्या शाप ऐकून ऐकून रस्ताही ठेकेदाराप्रमाणेच बधीर झालेला आहे. अशी अवस्था एकंदरीत दिसते. आत्ता कुठेतरी खडी आणि त्यावर टाकण्याचा चुर्मा खडीचे ढीग काही भागात दिसत आहेत. गुलाल खोबरे म्हणून निवडणूक काळात हे ढीग “कोणाच्या नावाने चांगभलं म्हणत म्हणत उधळायचे?” त्रस्त नागरिकांच्या अशा संतप्त प्रतिक्रिया ऐकावयास मिळत आहेत.अगोदर झालेले काम अत्यंत निकृष्ट दर्जाचे झालेले असताना त्याची दखल अध्याप कोणीही घेतलेली दिसून येत नाही. तक्रार कोणाकडे करायची? तालुक्यातील एका हप्तेखोर लोकप्रतिनिधीने तालुक्यातील एकही शासकीय, निमशासकीय कार्यालय हप्ते बांधून घेण्यापासून वंचित ठेवलेले नाही. एवढेच नव्हे तर विविध प्रकारची कामे करणारे मोठ मोठे ठेकेदार, अवैद्य व्यावसायिक इत्यादी देखील त्याच्या तावडीतून सुटलेले नाहीत.अधिकारी ठेकेदार यामुळे अक्षरशः पिळवटून निघाले. त्यामुळे रस्त्याची निकृष्ट कामे, अन्य विविध विभागातील रस्ते, गटारी, इमारती इत्यादींची होणारी निकृष्ट कामे याबद्दल आवाज उठवला गेला तरी त्याची दखल कोणत्याही पातळीवरून घेतली गेली नाही असे विदारक चित्र समोर आहे. माळशिरस तालुक्याला निधी आला मग विकास कुठे गेला? असा प्रश्न सर्वसामान्य नागरिकांपुढे आ वासून उभा आहे. कोट्यावधींचा निधी विविध शासकीय कामांसाठी माळशिरस तालुक्यात आला. तो निधी केव्हा, कुठे, कसा वापरला गेला? त्याचा विनीयोग सत्कर्मी झाला का नाही हा संशोधनाचा विषय झाला आहे. निधी आला. लोकप्रतिनिधी, अधिकारी कार्यकर्ता ठेकेदार, मालामाल झाले. पर्यायाने तालुक्याचा विकास रोडावला. रस्त्यांची दयनीय अवस्था निर्माण झाली. जिल्हा परिषद, पंचायत समिती, बांधकाम विभाग, ग्रामपंचायत, नगरपरिषदा इत्यादींच्या माध्यमातून होणारे रस्ते, गटारी, सिमेंट काँक्रेट रस्ते यांची गुणवत्ता किती हे एका वर्षातच उध्वस्त झालेले रस्ते आणि गटारी यातून स्पष्ट होते. पण याची खंत, ना वेदना अधिकारी, ठेकेदार, पुढारी यांना नाही. नागरिकांच्याकडून विविध कर रूपाने जमा होणारा पैसा विकास कामांच्या नावाखाली शासनाच्या वतीने निधी म्हणून येत असताना तेच नागरिक उघड्या डोळ्यांनी आपल्या कर रूपाने दिलेल्या पैशांची आणि त्यातून होणाऱ्या निकृष्ट कामांची दुर्दशा उघड्या डोळ्याने पहात आहेत. अकलूज महाळुंग रस्त्याच्या दुर्दशेचे प्रातिनिधिक स्वरूपात या ठिकाणी वास्तविक, वास्तव दर्शन घडविण्याचा प्रयत्न या माध्यमातून अकलूज वैभव, वृत्त एकसत्ता करीत आहे. या वृत्त लेखनामध्ये उल्लेख केलेला एक भ्रष्ट लोकप्रतिनिधी कोण? कामे घेणारे ठेकेदार कोण? सब ठेकेदार कोण? याचा विचार करत बसण्यापेक्षा आपल्या परिसरात होत असलेले काम लवकर आणि दर्जेदार कसे होईल याकडे ज्या त्या परिसरातील सुज्ञ नागरिकांनी मतदान करण्यापूर्वी दहा वेळा विचार करावा असे आवाहन अकलूज वैभव व वृत्त एकसत्ता
च्या या परखड आणि स्पष्ट भाषेतील संपादकीय वृत्तांकनाद्वारे करीत आहोत. संबंधित ठेकेदार, भ्रष्ट लोकप्रतिनिधी, अधिकारी यांनी आपापल्या नेमून दिलेल्या कर्तव्यात प्रामाणिकपणा ठेवला नाही तर त्यांना जनक्षोभाला सामोरे जावेच लागणार हे नक्की. योग्य वेळ येताच अशा भ्रष्ट अधिकारी आणि कर्मचाऱ्यांची लक्तरे वेशीवर टांगण्याचे काम आम्ही जागृत नागरिकांच्या सहकार्यानेच केल्याशिवाय स्वस्त बसणार नाही.