🟠अकलूज येथे 18 व्या राज्यस्तरीय लेझीम स्पर्धेला प्रारंभ
🟢58 लेझीम संघाचा सहभाग.
🔰 आकाश भाग्यवंत नायकुडे
Akluj Vaibhav News Network.
Chief Editor Bhagywant Laxmanrao Naykude.
Akluj, Taluka Malshiras, District Solapur. Maharashtra state, India.
Mo. 9860959764.
अकलूज दिनांक 08/01/2024 :
संग्रामसिंह मोहिते पाटील मित्र मंडळ व शिक्षण प्रसारक मंडळ अकलूज यांच्या वतीने दि. ८ ते १० जानेवारी २०२४ या कालावधीत आयोजित केलेल्या १८व्या राज्यस्तरीय भव्य लेझीम स्पर्धेला दिमाखात प्रारंभ झाला.
विजयचौक येथे स्पर्धेचे उद्घाटन अकलूज पोलीस ठाण्याचे पोलीस निरीक्षक दीपरतन गायकवाड, व अकलूज कृषी उत्पन्न बाजार समितीचे सभापती मदनसिंह मोहिते पाटील यांच्या हस्ते मैदान पूजनाने झाले. तत्पूर्वी उपस्थित मान्यवरांच्या हस्ते प्रतिमा पूजन आणि दीपप्रज्वलन करण्यात आले. यावेळी अध्यक्ष संग्रामसिंह मोहिते पाटील, मंडळाच्या कार्याध्यक्षा कु. स्वरूपाराणी मोहिते पाटील, दीपकराव खराडे पाटील, प्रदीपराव खरडे पाटील,सचिव अभिजीत रणवरे,सहसचिव हर्षवर्धन खराडे पाटील, सुमित्रा पतसंस्थेचे चेअरमन महादेव अंधारे, ज्येष्ठ खेळाडू लक्ष्मणआसबे, जि.प.सदस्या सुनंदाताई फुले यांचेसह सहकार महर्षि शंकरराव मोहिते पाटील सहकारी साखर कारखाना, शिक्षण प्रसारक मंडळ व परिसरातील विविध संस्थांचे आजी-माजी पदाधिकारी मोठ्या संख्येने उपस्थित होते.
सहकार महर्षि शंकरराव मोहिते पाटील यांच्या जयंतीनिमित्त, श्रीमती रत्नप्रभादेवी मोहिते पाटील यांचे जन्मशताब्दी वर्ष व जयसिंह मोहिते पाटील व मदनसिंह मोहिते पाटील या बंधूंच्या अमृत महोत्सवी वाटचाली निमित्त सदरच्या स्पर्धाचे आयोजन केले आहे. मदनसिंह मोहिते पाटील म्हणाले, टीव्ही, मोबाईलच्या जमान्यात विद्यार्थ्यांनी मैदानी खेळ खेळावेत. लेझीम खेळामुळे ताण तणाव कमी होऊन व्यायामाबरोबरच आनंदही मिळतो. जयसिंह मोहिते पाटील यांनी नेहमीच ग्रामीण कला आणि खेळांना प्रोत्साहन दिले आहे. या स्पर्धेमुळे शालेय पातळीवर मुले आणि मुली लेझीम खेळ खेळतात.
दीपरतन गायकवाड म्हणाले, ग्रामीण भारतीय संस्कृती पुढे नेण्यासाठी या स्पर्धा महत्त्वाच्या आहेत. महामानवांच्या जयंती पुण्यतिथी साजरी करताना डॉल्बीला फाटा देऊन लेझीम खेळ खेळावे व कार्यक्रमाची शोभा वाढवावी.
यावेळी जयसिंह मोहिते पाटील यांनी विविध संघातील खेळाडूंना प्रोत्साहन दिले. व त्यांचे कौतुक केले.
प्रस्ताविकात नामदेव कुंभार म्हणाले, ग्रामीण खेळाचे जोपासक जयसिंह मोहिते पाटील यांच्या मार्गदर्शनाखाली मंडळांने आजपर्यंत ४० हजार पेक्षा अधिक लेझीम खेळाडू निर्माण केले आहेत. गिनिज वर्ल्ड बुक मध्येही अकलूज च्या महालेझीम खेळाची नोंद झाली आहे.या स्पर्धेत प्राथमिक गट, ग्रामीणगट, शहरीगट मुले, मुली,व खुला गटातून ५८ संघांनी सहभाग घेतला आहे. स्पर्धेचा प्रारंभ सावता माळी विद्यालय माळेवाडी या मुलींच्या संघाने खेळ सादर करुन झाला. किरण सूर्यवंशी यांनी सूत्रसंचालन केले.
