🟣मुंबई कोणाची? मराठी का परप्रांतीयांची ?

🟣मुंबई कोणाची? मराठी का परप्रांतीयांची ?

Akluj Vaibhav News Network.
Chief Editor Bhagywant Laxmanrao Naykude.
Akluj , Taluka Malshiras, District Solapur. Maharashtra State , India.
Mo. 9860959764.

अकलूज दिनांक 29/9/2023 :
नुकतेच सोशल मिडियावर एक व्हिडिओ माझ्या पाहण्यात आला. त्यात एका मराठी देवरुखकर दांपत्याला मुबंईमध्ये एका गुजराथी सोसायटीत भाड्याने आँफिस घेण्यास “मराठी म्हणून” मज्जाव करण्यात आला. या इमारतीत मराठी लोकांना स्थान नाही असे व्हिडिओ मध्ये सोसायटीचा सचिव बाप-बेटे बोलताना दिसले. त्याच व्हिडिओ मध्ये देवरुखकर मराठी महिला रडून रडून सांगते की, त्यांनी माझा मोबाईल हिसकावून घेतला, आम्हाला धक्काबुक्की केली, माझ्या नवऱ्याला मारले आणि कोणालाही आणा पोलिसांना आणा आम्ही घाबरत नाही असे मुजोरपणे ते गुजराथी बाप-बेटे मोठ मोठ्याने बोलताना आढळले. त्याचबरोबर त्या मराठी महिलेने राजकीय पक्षांना आणि मराठी लोकांना आवाहन केले की, आपण महाराष्ट्रात आहोत की गुजरात मध्ये? त्यानंतर मनसे कार्यकर्त्यांनी त्या मराठी महिले सोबत जाऊन गुजराथी बाप-बेट्यांना माफी मागायला लावली. हा व्हिडिओ पाहिल्यानंतर मुंबई मधून मराठी माणूस हद्दपार झाला आहे हे पुन्हा एकदा सिध्द झाले.
गिरणी कामगार संपामुळे देशोधडीला लागला. कुटुंबियांच्या पोटाची खळगी भरण्यासाठी वाट्टेल ते काम करु लागला. राहती जुनी घरे, चाळी बिल्डरांनी दबाव टाकून अमिषे दाखवून खाली केल्या. तिथे टोलेजंग इमारती उभ्या राहिल्या. त्या इमारतीत परप्रांतीय लोकं रहायला आली. आपली मराठी माणसं स्वस्त घर शोधताना वसई, विरार, बदलापूर येथे रहायला गेली. आणि मुंबईत मराठी टक्का घसरला.
ही परिस्थिती मुंबई पुरतीच मर्यादित नसून संपूर्ण महाराष्ट्रातच परप्रांतीय गुजराथी, मारवाडी, उत्तरप्रदेश, बिहार, झारखंड येथील लोकांनी हात पाय पसरले आहेत. असे एकही गाव, वाडी, शहर नाही जिथे परप्रांतीय नाही. या लोकांनी महाराष्ट्रात येऊन रेशनकार्ड, आधारकार्ड, पॅन कार्ड बनवून घरं, दारं, दुकाने आणि प्राॅपर्ट्या विकत घेतल्या. मतदार याद्यांमध्ये नावे चढविली. त्यामुळे लोकसंख्येच्या बळावर त्यांचा दबदबा वाढला. लाचार राजकारणी नेते मंडळी मतांच्या जोगव्यासाठी त्यांच्यासमोर नतमस्तक होऊ लागली. आणि मग त्यांची मुजोरी वाढली. फक्त देवरुखकर दांपत्याचा व्हिडिओ समोर आला. परंतु, रोजच मुंबई आणि महाराष्ट्रात या परप्रांतीयांची मुजोरी वाढली आहे. अशा घटना रोजच घडत आहेत. परंतु, याच परप्रांतीयांना आपलीच मराठी राजकारणी लोकं साथ देत आहेत. एकही परप्रांतीय फुकटचे बसून खात नाही. त्यांनी प्रत्येक शहर, गाव, बाजारपेठा काबीज केल्या आहेत. रोज करोडो रूपयांची उलाढाल ते करतात. त्याच पैशाच्या बळावर ते मराठी माणसावर डोईजड होत आहेत.
राजकारणात मोहित कंबोज, किरीट सोमय्या यासारखी परप्रांतीय लोकं आपल्या मराठी नेत्यांना टार्गेट करत आहेत. आणि त्यांनाही आपलेच मराठी नेते साथ देतात. याच कंबोज आणि सोमय्याकडे प्राॅपर्ट्या कुठून आल्या? ते धुतल्या तांदळासारखे स्वच्छ आहेत का? महाराष्ट्रातील मराठ्यांची बाजू घेणारी शिवसेना फोडण्यासाठी हाच मोहित कंबोज अग्रेसर होता हे सर्वांनीच पाहिले आहे. शिवसेना कमजोर झाली की मुंबई, महाराष्ट्रात मराठ्यांवर राज्य करता येईल ही रणणिती त्यांनी आखली आहे. दिल्लीश्वर महाराष्ट्रावर जळतो हा इतिहास आहे. आणि आजही दिल्लीचा महाराष्ट्र आणि मुंबईवर डोळा आहे. मुंबई वाचवायची असेल तर शिवसेने शिवाय पर्याय नाही हे सर्व पक्षातील मराठी माणसाने लक्षात ठेवावे. राजकारण म्हणून तुम्ही कोणत्याही पक्षात रहा, पण जिथे मुंबईचा विषय आला तिथे शिवसेनेच्याच बाजूने उभे राहणे काळाची गरज आहे. अन्यथा आपल्याच राज्यात आपल्याला परकेसारखे रहायला लागेल. याचा ट्रेलर आपण देवरुखकर दांपत्याला मिळालेल्या वागणुकीवरून पाहिले आहेच. हे असेच होत राहिले तर मुंबई कोणाची? मराठ्यांची नाहीच ती परप्रांतीयांचीच होईल हे सर्वांनी लक्षात घ्यावे!

महेंद्र कुंभारे,
संपादक तथा कामगार नेते, भिवंडी.
मो.नं. 8888182324.