🅾️ मस्तवाल डीवायएसपी अनंत कुलकर्णीची लाथ पोलीस खात्यावर पडली

🅾️ मस्तवाल डीवायएसपी अनंत कुलकर्णीची लाथ पोलीस खात्यावर पडली

अकलूज वैभव न्यूज नेटवर्क
संकलक : आकाश भाग्यवंत नायकुडे.
मुंबई दिनांक 19/8/2025 :
नुकताच एक व्हिडिओ सोशल मीडियावर गाजत आहे त्यामध्ये जालना जिल्हाधिकारी कार्यालयासमोर गेली महिनाभर उपोषण करणाऱ्या गोपाळ चौधरी नावाच्या तरुणाला डीवायएसपी अनंत कुलकर्णी यांनी त्याच्या मागून जाऊन त्याच्या पाठीमागून कमरेत लाथ घातली त्याच्यामागे चालणारा त्याचा लहान मुलगा हे सर्व दृश्य बघत होता. गोपाळ चौधरीचा गुन्हा फक्त एकच होता, महिनाभर जिल्हाधिकारी कार्यालया समोर शांततेने उपोषण करणाऱ्या या तरुणाला न्याय मिळावा म्हणून तो पालकमंत्र्याकडे चालला होता आणि पालकमंत्र्याचा ताफा त्यांनी अडवला.
त्याला बखोटीला धरून खेचत घेऊन जाणाऱ्या पोलिसांच्या पाठीमागून जाऊन अनंत कुलकर्णी यांनी ही लाथ मारली.
कुलकर्णी तुम्ही गोपाळ चौधरीला लाथ मारली नाही. तुम्ही लाथ मारली ती पोलीस खात्यावर. ज्याच्यावर आज आमचा एवढा विश्वास आहे की आज आम्ही घराच्या बाहेर दिवसा पडतो ते फक्त बाहेर पोलीस आहेत म्हणून आणि रात्री बिनधास्त घरी झोपतो ते बॉर्डरवर असलेले आमचे सैनिक. त्यांच्या जीवावर आम्ही रात्री बिनधास्त झोपतो. या पोलीस खात्यावर तुमची ही लाथ बसलेली आहे.
त्या लहान मुलाच्या डोक्यावर आणि समाजावर या सर्व चित्रीकरणाचा काय परिणाम होईल याचा तुम्ही विचार केलात काय? सर्वसामान्य माणसाला न्याय मिळणार काय?
देशातील ग्रामपंचायत सदस्य, ग्रामसेवक, नगरसेवक, आमदार, खासदार , मंत्री,पंचायत समिती सदस्य ,तसेच जिल्हा परिषद सदस्य हे सर्व सामान्य लोकांचे सेवक आहेत. त्यांना भेटण्याचा अधिकार सर्वसामान्य लोकांना आहे आणि तो नाकारण्याचा अधिकार पोलिसांना दिलेला आहे का? अशा मुळे संपूर्ण भारतात महाराष्ट्रातील पोलिसांची प्रतिमा खराब होणार आहे याचा तुम्ही विचार केला का? स्वतःच्या घरात ब्लॅक अँड व्हाईट टीव्ही ऐवजी कलर टीव्ही सुद्धा घेण्याची ऐपत नसणारे अरविंद इनामदार सारखे पोलिस अधिकारी या महाराष्ट्राला मिळाले. साळस्कर, अशोक कामटे, हेमंत करकरे व स्वतःच्या छाताडावर अतिरेक्यांच्या बंदूक खेचणारे आणि गोळ्या झेलणारे तुकाराम ओबाळे सारखे पोलीस खात्यातील हवालदार यांच्या प्रतिमेवर तुम्ही चिखल उडवला. ज्या रागाच्या भरात तुम्ही हे सर्व केलं त्यामुळे महाराष्ट्राची मान शरमेने खाली झाली.
कोणत्या तोंडाने आम्ही जगाकडे पोलीस खात्याची स्तुती करू?
तुम्ही मारलेली लाथ गोपाळ चौधरी या युवकावर नसून पोलीस खात्यावर तुम्ही लाथ मारली आहे.
तुम्ही त्वरित राजीनामा द्या कारण तुमच्यामुळे आमचे पोलीस खाते बदनाम होत आहे.

सुरेंद्र हरिश्चंद्र नेमळेकर
संस्थापक सदस्य कोकण रेल्वे
940 41 356 19