🟣 कही आग न लग जाये “Last resort & lost resort”

🟣 कही आग न लग जाये

“Last resort & lost resort”

अकलूज वैभव न्यूज नेटवर्क
संकलन : आकाश भाग्यवंत नायकुडे
मुंबई दिनांक 23/03/2025 : आपल्या देशात एक घृणास्पद गोष्ट घडलेली आहे. त्यावरून माझ्या व्यवसायातील दोन छोट्या पण आशय मोठ्या असणाऱ्या गोष्टी मला आठवल्या त्या मी तुम्हाला शेअर करत आहे.
सुमारे 40 वर्षांपूर्वी आमच्या शहरात व्ही पी तावरे नावाचे न्यायाधीश होते. त्यांच्या त्यांच्या निवासस्थानी एके दिवशी सकाळी एक हमाल एक साखरेचे पोते घेऊन गेला व अमुक दुकानदारांनी हे पोते पाठवले आहे असे सांगितले तावरे साहेब अचंबित झाले.
त्यांनी त्वरित पोलिसांना बोलावून घेतले व साखरेच्या पोत्याचा पंचनामा केला हमालाचा जबाब घेतला व दुकानदारास बोलावून घेतले. दुकानदार घाबरत घाबरत आला. त्यांनी परिस्थिती ओळखली. दुकानदाराने हमाला वरच जाळ काढला. अरे मी तुला अमुक वकिलांच्या घरी पोहोचव म्हणून सांगितले होते आणि तू या साहेबांच्या ठिकाणी आलास काय असा बचाव घेतला.
पोलिसांनी वकिलाना पण पाचारण केले. वकिलानी मी साखरेचे पोते मागवले होते. दुकानदारांनी साहेबांच्या घरी पोहोचव असे सांगितल्यावर त्या हमालाचा गैरसमज झाला व त्यांनी आपल्याकडे पोहचवले असा जबाब दिला.
तावरे साहेबांना काय झाले होते लक्षात झाले. त्यांनी पोते उचलून नेण्यास सांगितले हा विषय इथेच थांबवला.
अशा प्रामाणिक न्यायाधीशांच्या समोर मला काम करायला मिळाले हे माझे परमभाग्य होय.
तावरे साहेब देवा घरी गेलेले आहेत, ते हयात नाहीत पण त्यांचा प्रामाणिकपणा अजूनही आठवणीच्या स्वरूपात अमर आहे.
सुमारे 30 वर्षांपूर्वी कोल्हापुरातील एका न्यायाधीशांच्या बद्दल ते भ्रष्टाचारी आहेत अशी बार मध्ये, वकील वर्गात कुजबूज सुरू झाली त्याचे रूपांतर एका मीटिंगमध्ये झाले.
कोल्हापूर जिल्ह्यातील सर्व वकील मिटींगला हजर होते अनेक वकील वक्त्यांनी त्या न्यायाधीशांच्या वर्तनाबद्दल भाषणे केली व यांची बदली करावी असा ठराव मांडण्याचे ठरवले.
त्यावर माझे गुरु लाटकर वकिल हे ताडकन उठले व त्यांनी या न्यायाधीशांची बदली करा असा ठराव करू नका असे भाषण केले.
बदली करण्याचा ठराव एकमताने होत असता लाटकर वकील का कोलदाडा घालत आहेत म्हणून वकील वर्ग चकित झाला. त्यावर लाटकर वकील यानी असे सांगितले त्या न्यायाधीशाची बदलीची मागणी करू नका. त्यांना नोकरीतून काढावे असा ठराव करा व तशी मागणी करा “आपल्या घरा दारातील कचरा दुसऱ्याच्या दारात टाकू नका”.
कही आग न लग जाये
आग ही वेगवेगळ्या प्रकारची असते. कधी पोटाचीअसते, कधी सूडाची कधी शरीराची. पण होळी पौर्णिमे दिवशी दिल्लीमध्ये लागलेली एक आग आमच्या सर्व व्यवस्थेला लागलेली आग आहे असे मला वाटत आहे.
एका हायकोर्टाचे घरी आग लागल्यानंतर आग विझवणाऱ्या कर्मचाऱ्यांना कोट्यावधी रुपये आढळून आले. पोलिसात कळवले गेले. त्याची आता छाननी सुरू आहे.
सर्व प्रसार माध्यमावर सोशल मीडियावर चर्चा सुरू झाली.
अहलाबाद हायकोर्टाच्या वकिलांनी आमचे हायकोर्ट म्हणजे कचरा पेटी आहे काय असे लाटकर वकिलांच्या सारखे मत दिले.
हजार दोन हजार रुपये लाच घेताना कर्मचारी सापडला तर तो अटकेत जातो. त्याला पोलीस कस्टडी मिळते व तो नोकरीवरून त्वरित सस्पेंड केला जातो. कोट्यावधी रुपयाची माया असणार आहे. मायाळू जज्ज याची मात्र बदली होते.
केवळ ध्वज दिनाची तिकिटे सक्तीने घ्यायला लावली म्हणून एका तहसीलदाराला पदाचा गैरवापर केला म्हणून मोठ्या कायदेशीर कारवाईला या देशात तोंड द्यावे लागले होते. पण कायद्याचे संरक्षण अशा लोकांना मिळते.
न्यायव्यवस्था ही भारतीय जनतेसाठी गोरगरिबासाठी “लास्ट resort” आहे पण आता असे म्हणता येणार नाही आता न्यायव्यवस्था ही “lost resort” आहे असे म्हणावे लागेल.
अशा आगी वारंवार लागू होत व त्यानिमित्ताने धुराबरोबर काळा पैसा बाहेर येऊ हीच परमेश्वरा जवळ विनंती

अनिल रुईकर ,
9823255049
इचलकरंजी