🟠उद्योग व्यवसाय सुरू करतानाच्या अनावश्यक परवानग्यांचा पुनर्विचार करण्यात यावा : आ. रणजितसिंह मोहिते पाटील

🟠उद्योग व्यवसाय सुरू करतानाच्या
अनावश्यक परवानग्यांचा पुनर्विचार करण्यात यावा
: आ. रणजितसिंह मोहिते पाटील

🟣विधिमंडळाच्या पावसाळी अधिवेशनात ‘महाराष्ट्र उद्योग, व्यापार व गुंतवणूक सुविधा विधेयक २०२३’ वर झालेल्या चर्चेतील सहभाग

Akluj Vaibhav News Network Chief Editor Bhagywant Laxman Naykude.
Akluj , Taluka Malshiras District Solapur Maharashtra State, India.
Mo. 9860959764.

(आकाश भाग्यवंत नायकुडे यांज कडून)

मुंबई दिनांक 27/7/2023 : उद्योग व्यवसाय सुरू करतानाच्या अनावश्यक परवानग्यांचा पुनर्विचार करण्यात यावा अशी सूचना आ. रणजितसिंह मोहिते पाटील यांनी केली. विधिमंडळाच्या पावसाळी अधिवेशनात आज (दि.27) ‘महाराष्ट्र उद्योग, व्यापार व गुंतवणूक सुविधा विधेयक २०२३’ वर झालेल्या चर्चेत सहभाग नोंदविताना ते बोलत होते. विधानसभेने संमत केलेल्या या विधेयकावर विधान परिषदेत  चर्चा झाली.

या चर्चेत सविस्तर बोलताना ते पुढे म्हणाले की, कोणताही उद्योग व्यवसाय सुरू करण्यासाठी आवश्यक परवानग्या मिळविण्यासाठी अनेक कार्यालयांकडून एक खिडकी योजना (सिंगल विंडो) राबविण्यात येते. आजही अनेक ब्रिटिशकालीन नियम बऱ्याच परवानग्या देताना लावले जात असल्याचे निदर्शनास येते. या नियमांची आवश्यकता आहे का याची चाचपणी करून अनावश्यक परवानग्यांचा पुनर्विचार करण्यात यावा.तसेच अनेक उद्योगांना कर परतावा आणि सबसिडी जाहीर करण्यात येते हे व्यापाऱ्यांना वेळेत अदा करण्यात यावे. अनेकदा कर परतावा दोन वर्षे उलटूनही मिळत नाही अशी वस्तुस्थिती आढळून येते. या बाबीचा विचार करावा.तसेच महाराष्ट्रात जे विविध क्षेत्रातील उद्योग बंद झाले आहेत त्यांच्याबाबत श्वेतपत्रिका काढण्यात आली आहे का अशी विचारणा करीत, अशी श्वेतपत्रिका काढल्यास हे उद्योग नेमके कशामुळे बंद झाले, याची कारणे काय होती हे लक्षात येऊन भविष्यात त्यावर उपाययोजना करता येतील असे मत प्रभावीपणे मांडले. पंतप्रधान नरेंद्र मोदीजी यांच्या संकल्पनेतील MSME ही अत्यंत चांगली योजना आहे. या योजनेच्या माध्यमातून राज्यात कोणते उद्योग सुरू झाले, तसेच ही योजना राबविण्यात काय अडचणी येत आहेत अशी विचारणा करुन याबाबत मंत्री महोदयांनी बैठक घेऊन तोडगा काढावा अशी सूचना सभागृहात बोलतांना आ. मोहिते पाटील यांनी मांडली.