💢 22 पासून निवडणूक नामनिर्देशन पत्रांच्या विक्रीस प्रारंभ .दि.23 अखेर 29 व्यक्तींनी 44 नामनिर्देशन पत्र घेतली🟢 पहिल्या दोन दिवसात एकाही उमेदवाराने नामनिर्देशन पत्र दाखल केले नाही.🔵 एकही वाहतूक वाहन परवाना घेतला गेला नाही

Chief Editor24/10/2024Last Updated: 24/10/2024

103 1 minute read

अकलूज वैभव न्यूज नेटवर्क
आकाश भाग्यवंत नायकुडे
मुंबई दिनांक 23/10/2024 : दिनांक 22 पासून निवडणूक नामनिर्देशन पत्रांच्या विक्रीस प्रारंभ झाला असून दुपारी तीन वाजेपर्यंत 19 व्यक्तींनी 22 नामनिर्देशन पत्रे घेतली आहेत तथापी पहिल्या दिवशी एकाही उमेदवाराने नामनिर्देशन पत्र दाखल केले नाही. तसेच एक खिडकी कक्षातून पहिल्या दिवशी एकही वाहतूक वाहन परवाना घेतला गेला नाही अशी माहिती अधिकृतपणे देण्यात आली आहे.
दिनांक 23/ 10 /2024 दुपारी तीन वाजेपर्यंत 29 व्यक्तींनी 44 नामनिर्देशन पत्र खरेदी केली आहेत मात्र एकही नामनिर्देशन पत्र दुसऱ्या दिवशीही दाखल झालेले नाही. तसेच वाहतूक वाहन परवाना याचीही कोणी परवानगी घेतलेली नाही.
विधानसभा सार्वत्रिक निवडणूक २०२४ अनुषंगाने निवडणूक कार्यक्रम जाहीर झालेला असून २५४- माळशिरस (अ.जा) विधानसभा मतदार संघ निवडणूककामी दिनांक २२ ते २९ आक्टोंबर या कालावधीत सकाळी ११.०० ते दुपारी ०३.०० वाजेपर्यंत निवडणूक निर्णय अधिकारी २५४- माळशिरस (अ.जा.) विधानसभा मतदार संघ तथा उपविभागीय अधिकारी,माळशिरस विभाग अकलूज,सुजयनगर-१,अकलूज यांचे कार्यालयात नामनिर्देशनपत्र स्विकारण्यात येतील.सार्वजनिक सुट्टीच्या दिवशी नामनिर्देशनपत्र स्विकारले जाणार नाही.
नामनिर्देशन दाखल करताना उमेदवाराने किंवा त्यांचे एका प्रस्तावकाने स्वतः उपस्थित राहून नामनिर्देशन पत्र दाखल करावयाचे आहे. एका उमेदवारास एका विधानसभा मतदार संघात जास्तीत जास्त चार नामनिर्देशनपत्र दाखल करता येतील.नामनिर्देशनपत्र दाखल करताना कार्यालयापासून १०० मीटर अंतरामध्ये वाहनांना प्रवेश दिला जाणार नाही. नामनिर्देशन पत्र दाखल करताना उमेदवाराला तीन पेक्षा जास्त वाहनांचा समावेश करता येणार नाही.यासाठी या कार्यालयाकडून वाहनांना वाहतुक परवाना घेणे आवश्यक आहे.तसेच नामनिर्देशन पत्र दाखल करताना उमेदवारासोबत केवळ चार व्यक्तींना उपस्थित राहता येईल. उमेदवाराने नामनिर्देशन दाखल करताना फॉर्म २६ मधील शपथपत्र दाखल करणे आवश्यक आहे.सदरचे शपथपत्र हे न्यायदंडाधिकारी प्रथम वर्ग किंवा नोटरी पब्लीक किंवा मा उच्च न्यायालयाने शपथपत्र करण्यासाठी प्राधिकृत केलेल्या शपथ आयुक्त यांच्यासमोर केलेल्या असणे बंधनकारक आहे.तसेच शपथपत्राच्या प्रत्येक पानावर उमेदवाराची स्वाक्षरी व नोटरीचा शिक्का असणे बंधनकारक आहे.सदरचे शपथपत्र हे ५०० रु स्टॅम्पवर द्यावयाचे आहे.
नामनिर्देशन दाखल करताना उमेदवाराने ठरवून दिलेल्या २ से.मी.X२.५ से.मी.आकाराचे अलीकडील काळातील मा.निवडणूक आयोगाने दिलेल्या निकषाप्रमाणे असलेले छायाचित्र चिटकवावे. नामनिर्देशन पत्रासोबत अनामत रक्कम रुपये ५०००/-भरावयाची आहे. निवडणूकीसाठी उमेदवारास स्वतंत्र बॅंक खाते उघडणे आवश्यक आहे. असे विजया पांगारकर, निवडणूक निर्णय अधिकारी २५४ – माळशिरस (अ.जा.) विधानसभा मतदारसंघ तथा उपविभागीय अधिकारी माळशिरस विभाग अकलूज यांनी एका प्रसिद्धी पत्रकाद्वारे सुचित केले आहे.