🟩भा.ज.पा.(B.J.P.)ची सत्ता असलेल्या आणखी एका राज्यात समान नागरी विधेयकाच्या हालचाली; 🟦विवाह, घटस्फोट आणि….

🟩भा.ज.पा.(B.J.P.)ची सत्ता असलेल्या आणखी एका राज्यात समान नागरी विधेयकाच्या हालचाली;

🟦विवाह, घटस्फोट आणि….

Akluj Vaibhav News Network.
Chief Editor Bhagywant Laxmanrao Naykude.
Akluj, Taluka Malshiras, District Solapur. Maharashtra state, India.
Mo. 9860959764.

(वृत्तसंस्था),

अकलूज दिनांक 08/02/2024 :
जयपूर भा.ज.पा.(B.J.P.)ची सत्ता असलेल्या उत्तराखंड राज्यातील मंत्रिमंडळाने समान नागरी विधेयकाचा मसुदा मंजूर केल्यानंतर आता राजस्थानमध्येही लागू करण्याच्या हालचाली सुरू झाल्या आहेत.मुख्यमंत्री भजनलाल यांच्या मंत्रिमंडळातील अनेक मंत्र्यांनी या संदर्भात विधानेही केली आहेत.त्यामुळे लवकरच या संदर्भातील प्रक्रियेला वेग येईल,अशी चिन्हे दिसत आहेत.
समान नागरी कायदा अर्थात यू.सी.सी.(U.C.C.) हे देशासाठी कसे आवश्यक आहे, त्याची अंमलबजावणी तातडीने लागू करण्याची कशी गरज आहे, याबाबत राजस्थानचे अनेक मंत्री वेळोवेळी विधाने करत आहेत. त्यामुळे राज्य सरकार लवकरच यासाठी मसुदा समितीची स्थापना करू शकते.
या समितीच्या माध्यमातून विधानसभेत प्रस्ताव आणला जाईल आणि त्यानंतर तो लागू केला जाईल,
असे म्हटले जात आहे. ‘मुख्यमंत्री भजनलाल शर्मा यांनी समान नागरी विधेयक विधानसभेत आणण्यास मंजुरी दिली आहे.
आम्ही सध्या सुरू असलेल्या किंवा पुढील अधिवेशनात हे विधेयक आणू,’
असे सूतोवाच राजस्थानचे मंत्री कन्हैया लाल चौधरी यांनी केले. कोणत्याही प्रकारचा सामाजिक अन्याय दूर करण्यासाठी आजच्या काळात या विधेयकाची नितांत गरज आहे, असे त्यांनी स्पष्ट केले.
उत्तराखंडप्रमाणेच विवाह, घटस्फोट आणि मालमत्तेचा वारसा या संदर्भातील मुद्दे प्रस्तावित समान नागरी विधेयकात मांडले जातील.
तसेच, बहुपत्नीत्व आणि धार्मिकतेच्या कारणांवरून होणाऱ्या घटस्फोटांनाही या विधेयकाच्या माध्यमातून रोखण्याचा प्रयत्न या विधेयकातून केला जाईल.
शिवाय, उत्तराखंडप्रमाणेच राजस्थानच्या समान नागरी विधेयकातूनही आदिवासी जमातींना वगळले जाईल,असे म्हटले जात आहे. केंद्रातील नरेंद्र मोदी सरकारकडून हे विधेयक संसदेत सादर करण्याआधीच देशभरात समान नागरी विधेयकाबाबत राष्ट्रव्यापी एकमत तयार व्हावे, यासाठी सरकारचा हा प्रयत्न सुरू असल्याची माहिती सूत्रांनी दिली. राजस्थानच्या विधानसभेत भा.ज.पा.(B.J.P.)चे सर्वाधिक ११५ आमदार असल्याने हे विधेयक संमत होण्यास कोणताही अडथळा येणार नाही. शिक्षण मंत्र्यांनीही दिले आश्वासन जयपूरमध्ये एक मुलगी तंजीम मेरानी गेल्या पाच दिवसांपासून उपोषणाला बसली आहे. शाळांमध्ये हिजाबबंदी घालावी, तसेच देशात सी.ए.ए.(C.A.A.) आणि समान नागरी कायदा लागू करावा,
या मागणीसाठी तिने उपोषणाला सुरुवात केली आहे. त्यावर समान नागरी कायद्याचा मसुदा तयार करण्याकरिता समिती स्थापन करण्यासाठी लवकरच मंत्रिमंडळ बैठकीत प्रस्ताव मांडला जाईल,
असे लिखित आश्वासन राजस्थानचे शिक्षणमंत्री मदन दिलावर यांनी तंजिमला दिल्यानंतर तिने हे उपोषण मागे घेतले.