🟡 जल्लोषात श्री गणेशाचे आगमन 🟣 भक्तिमय वातावरणात प्राणप्रतिष्ठापना

Chief Editor29/08/2025Last Updated: 29/08/2025

60 1 minute read

🟡 जल्लोषात श्री गणेशाचे आगमन
🟣 भक्तिमय वातावरणात प्राणप्रतिष्ठापना

अकलूज वैभव न्यूज नेटवर्क
आकाश भाग्यवंत नायकुडे
मुंबई दिनांक 27/8/2025 : अत्यंत धार्मिक हर्षौल्लासात आणि जल्लोषात सर्वत्र श्री गणेशाचे आगमन होऊन अत्यंत भक्तिमय वातावरणात प्राणप्रतिष्ठापना आरती प्रसाद वाटप इत्यादी सोपस्कार पार पडले. बाजारपेठेमध्ये श्री गणेश मूर्तींबरोबरच गौरीं मुखवट्यांचे स्टॉल त्याचबरोबर गौरी आणि गणपतीच्या सजावटीच्या वस्तूंसाठी जागोजागी विक्री सुरू होती. यावर्षी बाजारपेठेत फेरफटका मारला असता, यावर्षी पूर्वीपेक्षाही अधिक श्री गणेश मूर्तीं विक्रीसाठी आलेल्या होत्या हे प्रकर्षाने निदर्शनास आले. पारंपरिक वाद्यांच्या तालसुराने व श्री गणेश भक्त भाविकांनी श्री गणेशाच्या नावाने केलेल्या नामघोषाने अवघा आसमंत निनादून गेलेला होता. वरूण राजाने अत्यल्प रिमझिम करून श्री गणेशासाठी पायघड्या घालून आपली सेवा पूर्ण केली. घरोघरी आणि गावातील गल्लीबोळात गणपती बाप्पांची एकच धूम सुरू असल्याचे दिसून आले.
अकलूज पोलीस स्टेशन ने पोलीस, होमगार्ड आणि पोलीस मित्र यांच्या मदतीने सर्वत्र चोख बंदोबस्त लावलेला असल्यामुळे कोणताही अनुचित प्रकार न घडता श्री गणेशाचे आगमन आणि प्रतिष्ठापना शांतता आणि सुव्यवस्थेत पार पडली. सार्वजनिक गणेश मंडळांनी आपापल्या मंडळातील कार्यकर्त्यांच्या मदतीने श्री गणेश मूर्ती बसविण्याची प्रक्रिया पूर्ण केली. त्याचबरोबर श्री गणेश मूर्ती समोर विविध धार्मिक, सामाजिक, पर्यावरणपूरक, समाज प्रबोधन पर देखावे उभारण्याचे कार्यास अंतिम रूप देण्याचा प्रयत्न केला.