💢 दांडीबहाद्दर शिक्षकांवर कारवाई करा -संजय वाघमोडे 🟡 मुख्य कार्यकारी अधिकारी आणि शिक्षणाधिकारी यांना यशवंत क्रांती संघटनेचे निवेदन-

Chief Editor01/08/2024Last Updated: 01/08/2024

379 2 minutes read

💢 दांडीबहाद्दर शिक्षकांवर कारवाई करा -संजय वाघमोडे

🟡 मुख्य कार्यकारी अधिकारी आणि शिक्षणाधिकारी यांना यशवंत क्रांती संघटनेचे निवेदन-

अकलूज वैभव न्यूज नेटवर्क
आकाश भाग्यवंत नायकुडे
मुंबई दिनांक 01/08/2024 :
कोल्हापूर जिल्ह्यातील दांडीबहाद्दर जि.प. शिक्षक यांचेवर कारवाई करण्यात यावी अशी मागणी यशवंत क्रांती संघटनेचे अध्यक्ष संजय वाघमोडे यांनी केली. संजय वाघमोडे यांच्या नेतृत्वाखाली संघटनेच्या शिष्टमंडळाने कोल्हापूर जिल्हा परिषदेचे मुख्य कार्यकारी अधिकारी आणि शिक्षण अधिकारी यांची भेट घेऊन याबाबत सविस्तर चर्चा करून कार्यवाही करण्याबाबत निवेदन देण्यात आले.

निवेदनात म्हटले आहे की, कोल्हापूर जिल्ह्यातील अनेक शाळांमध्ये शिक्षक वेळेवर उपस्थित राहत नाहीत. शिक्षक उपस्थित नसल्यामुळे विद्यार्थ्यांची फार मोठी गैरसोय होत आहे. दुर्गम भागातील राधानगरी, चंदगड, आजरा, शाहूवाडी, भुदरगड, गगनबावडा, या तालुक्यातील अतिदुर्गम भागात एक शिक्षक व दोन शिक्षकी शाळा आहेत. या शाळांमधील परिस्थिती तर अतिशय विदारक आहे. दुर्गम भागातील या शाळा विशेषतः डोंगरात, जंगल भागात आहेत. शाळेच्या सभोवताली घनदाट जंगल आहे. या जंगलामध्ये असणाऱ्या एक शिक्षक किंवा दोन शिक्षकी शाळांमध्ये कधीही दोन शिक्षक उपस्थित नसतात. तसेच एक शिक्षकी शाळेत शिक्षक न आल्यास शाळाच दिवसभर बंद रहाते. मुले शाळेच्या आवारात दिवसभर खेळत असतात. अनेक दुर्गम भागातील शाळेच्या सभोवती घनदाट जंगल आहे. या परिसरामध्ये बिबट्या, अस्वल, विषारी साप, गवे, हत्ती असा प्राण्यांच्या वावर असल्याने हे प्राणी विद्यार्थ्यांच्या वर हल्लाही करू शकतात. (यापुर्वी शाहुवाडी तालुक्यात बिबट्‌याच्या हल्यात दोन लहान मुलींचा बळी गेला आहे.) तसेच मुलं शाळेत गेली कि घरचे पालक घराला कुलूप लावून शेतात जातात. त्यामुळे हि मुलं घरी परत ही जावू शकत नाही. शाळेत दुपारचे जेवण मिळत असल्याने हि मुलं घरातून डबा घेऊन येत नाहीत. त्यामुळे शिक्षक शाळेत न आल्यास हि मुलं दिवसभर उपाशी पोटी असतात.
सबंधित शाळेतील शिक्षकांच्याकडे शाळेत न आल्याबाबत चौकशी केल्यावर शिक्षक अर्जंट माहिती वरिष्ठ कार्यालयकडून मागवली आहे. ती केंद्र शाळेत, पंचायत समितीत देण्यासाठी आलो आहे. वेळेत एस टी आली नाही. शाळेत एकच शिक्षक असल्याने शाळा बंद ठेवली आहे. अशी कारणे सांगितली जातात. काही शिक्षक १२.३० वाजता येतात तर ३ वाजता जातात. शाळेत शिक्षक नसल्याने विद्यार्थ्यांचे नुकसान होत आहे. तर शाळेत शिक्षक नसल्याने पालक आपल्या मुलांना शाळेतून काढून खासगी शाळेत दाखल करत आहेत त्यामुळे जिल्हापरिषद शाळेतील पटसंख्या झपाट्‌याने कमी होऊन शाळा बंद पडण्याच्या मार्गावर आहेत.
याकडे तातडीने लक्ष घालून वेळेत उपस्थित न राहणाऱ्या जिल्ह्यातील जि. प. शाळेतील शिक्षकांच्यावर कडक कारवाई करावी. तसेच एक शिक्षक असलेल्या शाळेतील शिक्षकास शाळेच्या वेळेत माहिती देणेसाठी वरिष्ठ कार्यालयात शाळा बंद करून किंवा लहान मुलांना शाळेत ठेऊन बोलवण्यात येऊ नये. तसेच जिल्हा व तालुकास्तरावर भरारी पथक नेमुन जिल्ह्यातील सर्व शाळांना भेटी देऊन वेळेवर उपस्थित न राहणाऱ्या शिक्षकांना पकडून त्यांच्यावर कडक कारवाई करण्यात यावी. जिल्ह्यातील दुर्गम भागातील अनेक शाळांना गळती लागल्याने विद्यार्थ्यांना पाण्यात बसावे लागत आहे. सतत पाण्यामुळे अनेक विद्यार्थ्यांच्या पायांना जखमा झालेल्या आहेत. शाळा दुरुस्तीसाठी वारंवार पाठपुरावा करून ही शाळा दुरुस्त करण्यात आलेल्या नाही तरी त्यांची दुरुस्ती करण्यात यावी. शिष्टमंडळात संघटनेचे संस्थापक अध्यक्ष संजय वाघमोडे, कोल्हापूर जिल्हा संपर्क प्रमुख सुनील शेळके,शाहुवाडी तालुका युवक अध्यक्ष,संजय दफडे, विठ्ठल हुंबे, दीपक माने, ज्ञानदेव फाले, गंगाराम बोडके,दादा गावडे,इ.पदाधिकाऱ्यांचा समावेश होता. अतिरिक्त मुख्य कार्यकारी अधिकारी अजय माने यांनी निवेदन स्विकारले.