🟣अवैध गर्भपाताने घटला मुलीचा जन्मदर. माळशिरस तालुका आढावा बैठकीत उमटले पडसाद.

🟣अवैध गर्भपाताने घटला मुलीचा जन्मदर.
माळशिरस तालुका आढावा बैठकीत उमटले पडसाद.

Akluj Vaibhav News Network.
Chief Editor Bhagywant Laxman Naykude.
Akluj , Taluka Malshiras, District Solapur. Maharashtra State, India.
Mo. 9860959764.

अकलूज दिनांक 13/6/2023 :
अवैध गर्भपाताने घटला मुलीचा जन्मदर. याचे पडसाद माळशिरस तालुका आढावा बैठकीत उमटले.
शेजारच्या जिल्ह्यातून फिरते वाहनातून येऊन एजंटामार्फत संबंधित महिलेचा कधी शेतात तर कधी शेतातील घरात गर्भपात केला जात असल्याचा आरोप धैर्यशील मोहिते-पाटील यांनी केला. अवैध गर्भपाताने मुलीचा जन्मदर घटला आहे.आरोग्य विभागाकडे प्रत्येक गर्भधारणा झालेल्या स्त्रीची माहिती असते.मग बाळंत होणाऱ्या स्त्रीयांचा आकडा कमी कसा होतो. आरोग्य यंत्रणेचे याकडे लक्षच नाही.यावर उत्तर देताना तालुका वैद्यकिय अधिकारी डॉ. रामचंद्र मोहिते यांनी माहिती घेऊन सांगतो असे उत्तर दिले. तर गर्भपात करणा-यांवर ३०२ चे गुन्हे दाखल करण्याची मागणी आ. राम सातपुते यांनी केली.
माळशिरस तालुका आढावा बैठकीत आमदार रणजितसिंह मोहिते पाटील यांनी गेल्या आढावा बैठकीत सांगितलेल्या विकास कामांचा आढावा आधी द्या असे सांगताच काही कामे मंजूर झाली आहेत, काहींचा निधी आला नाही, तर काहींचे टेंडर नोटीस करण्याचेकाम चालू असल्याचे सांगत अधिकाऱ्यांनीच आमदारांना सदरची कामे लवकर पूर्ण करू अशी आश्वासने दिली.
माळशिरस तालुक्याची आढावा बैठक आ. रणजितसिंह मोहिते-पाटील यांच्या प्रमुख उपस्थितीत पार पडली. यावेळी आ. राम सातपुते, शिवामृत दूध उत्पादक सहकारी संघाचे चेअरमन धैर्यशील मोहिते-पाटील, अर्जुनसिंह मोहिते-पाटील, शिवतेजसिंह मोहिते-पाटील, प्रांताधिकारी नामदेव टिळेकर, तहसिलदार अमर वाकडे, अकलूज नगरपरिषदेचे मुख्याधिकारी दयानंद गोरे, गटविकास अधिकारी विनायक गुळवे, ॲड. प्रकाश पाटील, बाबाराजे देशमुख, बापूराव पांढरे, मिलींद कुलकर्णी, उत्कर्षाराणी पलंगे, ॲड. बी. वाय. राऊत, प्रतापराव पाटील उपस्थित होते.
या बैठकीच्या सुरुवातीला सार्वजनिक बांधकाम खात्याच्या अधिकाऱ्यांनी गेल्या आढावा बैठकीत पंधरा पुलांची मागणी करण्यात आली असून त्यातील फक्त चारच कामे मंजूर असून त्याचे काम चालू असल्याचे सांगत इतर ठिकाणची कामे लवकरच मंजूर करून सुरू असे सांगितले. मुख्यमंत्री ग्राम सडक व पंतप्रधान ग्राम सडक योजनेतीलही कामेचालू असल्याचे सांगितले बैठकीत रस्त्यांच्या दर्जाबाबत सांगितलेल्या तक्रारी तशाच असल्याचे बाबाराजे देशमुख यांनी सांगितले.
कृषी विभागात चार सर्कल, ४८ कृषी सेवक असून त्यांचा शेतकऱ्यांची संपर्क नाही तालुक्यात शेतकरी किती? कोणती व किती खते येतात? प्रकल्प कोणते वकुठे राबविण्यात आले याबाबतची समाधान कारक उत्तरे अधिकाऱ्यांना देता आली नाहीत.
तालुक्यात होणाऱ्या विजेच्या लपंडावाने हैराण झालेल्यांनी आपल्या भावना तीव्र शब्दांत व्यक्त केल्या.याचबरोबर तालुक्यातील शिधा वाटपाची स्थिती, मंजुरीस दिलेली विकास कामे, जलयुक्त शिवार योजने अंतर्गत कामाची स्थिती, टँकरने पाणी पुरवठा अशा विविध अडचणींची, मंजुर व प्रस्तावित कामांचा आढावा घेण्यात आला.